Nangilog sa armas napusilan

Lalaking nadakpan sa checkpoint  tungod  sa paghupot og mga pinaugang dahon sa Marijuana  napusilan human  mosuway og labni sa armas sa polis sa miaging gabii sa sulod sa buhatan sa investigation section sa Consolacion Police Station.

Ang nadakpan nga gidala sa tambalanan mao si Jonas Paglinawan Señor, 31 anyos,  nga taga sitio Lomboy sa barangay Labogon, dakbayan sa Mandaue.

Ang backrider nga nailhan lang sa angga nga Dugnay ang dali kaayong nakaambak sa giluwanan nga motorsiklo  pagkakita  sa   checkpoint  diha sa barangay Casili.

Mikaratil kini'g dagan paingon sa ngitngit nga bahin sa maong dapit ug gibiyaan ang kauban kinsa nakalitan ug wala na makapadagan dihang gialihan sa mga polis.

Si Inspector  Baliguat miingon nga dihang girikisa ang kalawasan sa maong dinakpan maoy nakuha ang duha ka bugkos nga pinaugang dahon sa Marijuana nga giputos pa og newspaper.

Gidala nila ang suspetsado sa ilang buhatan ngadto sa ilang buhatan ug dihang gisukitsukit ni PO3 Ruben Alin kalit niining gilabni ang gitakin niining armas.

Nahitabo ang pag-inilogay sa armas nila ni PO3 Alin ug si PO3 Geromy Espinosa nga nakamatikod ang dali nga nakaibot sa iyang armas ug napusilan ang bukton sa  maong dinakpan.

Dali nga gidala sa tambalanan ang maong dinakpan ug human sa pagtambal gibalik kini  og dala sa kapolisan sa ilang buhatan  ug gibalhog sa bilanggoan.

Si Inspector Baliguat miingon nga ang suspetsado nga gitanggong na karon sa bilanggoan ang ilang pasakaan og kaso nga kalapasan sa paghupot og  ilegal nga drugas ug ang pagsulay unta sa pag-ilog sa armas sa polis nga gipaubos na karon sa  imbestigasyon.