Radaza nangandam na pagtubag sa kiha

Pormal na nga nadawat ni Lapulapu City Mayor Arturo Radaza ang resolution gikan sa Ombudsman may kalambigitan sa pagpasaka na og kasong kriminal batok kaniya gumikan sa kontrobersiyal nga pagpaburot sa presyo sa decorative lamp post sa milabay'ng 12th ASEAN Summit dinhi sa Sugbu.

 Matod pa ni  Radaza   nadawat ang resolution gikan ni  Merceditas Gutierez ug kini maoy gilihok karon sa iyang mga abogado alang sa ilang tukmang lakang nga pagahimoon.

 Matod pa ni Radaza nga posibleng moduso sila og motion for reconsideration sa maong resolution ug kini nagmalaumon nga makalingkawas ra gihapon sa maong kaso.

 Subay niini andam usab kini sa pagdawat sa bisan unsang kamanduan gikan sa korte gumikan kay sayod siya nga walay anomaliya sa iyang pagpirma sa maong kontrata sa pagmuntar sa mga lamp post sa dakbayan sa Lapulapu.

 Gihimong ehemplo ni   Radaza ang iyang pagdawat sa unom ka bulan nga suspensiyon sa milabay'ng tuig sa kasong administratiba ug kung ugaling mahitabo na usab niining kasoha andam siya sa pagdawat niini inubanan sa iyang pagpakita ngadto sa korte  og pagmatood nga wala  siyay kalambigitan sa maong issue.

 Kahinumduman nga si Mayor Radaza lakip sa girekomendar sa Ombudsman nga pasakaan og kasong kriminal gumikan sa kalambigitan niini sa pagpaburot sa presyo sa mga decorative lamp post atol sa ika 12 nga ASEAN Summit dinhi sa Sugbu.