Gitangkugo pagpusil sa ruweda

Gipusil sa iyang bukobuko ang usa ka lalaki nga paingon na untang mobuhi sa iyang manok igtatari atol sa gipahigayong tigbakay sa barangay Tuminjao lungsod sa Daanbantayan niadtong Lunes sa alas 4:00 pasado sa hapon.

Ang biktima giila sa kapulisan nga si Reil Ducante Recla, molupyo sa barangay Tapilon sakop sa maong lungsod.

Samtang ang gitumbok nga suspek mao ang usa ka Roselo Trangia alyas Selo, molupyo sa nahisgutang lugar.

Matod ni SPO4 Melchor Batucan sa Daanbantayan Police Station dihang nahinabi sa Banat News nagbitbit ang biktima og manok igtatari nga gitaoran na og bulang sulod sa roydahan alang sa pagsugod na unta sa sultada.

Subay sa pamahayag sa mga nakasaksi kalit lang nisulod ang suspek ug nilipot sa luyo sa biktima ug sa dayong buhi na sa manok nibunot ang suspek sa giloklok nga armas ug gipusil ang biktima.

Ang biktima daling gidala sa Daanbantayan District Hospital samtang ang suspek niuban og eskapo sa mga tawo nga nagkatibuwaag ug nag-iyahay og panagan.

Personal nga panag-away ang gitutukan karun sa nagpadayon nga imbistigasyon sa kapulisan. (Darrel A. Carumba)