Patay ang usa ka PUJ drayber human kini gipusil alas 5 pasado sa buntag kagahapon sa Phase II, barangay Pulpogan, lungsod sa Consolacion.
Ang namatay mao si Miguel Zalazar, 40 anyos, ulitawo ug nagpuyo sa maong dapit.
Gipusil sa wala pa hiilhing lalaki ang biktima kinsa nakabaton og duha ka samad sa dughan, liog, tiil ug uban pang bahin sa kalawasan.
Ang wala hiilhing mamumuno ang dali usab kaayong nakapahilayo sa maong dapit human sa maong pagpamusil.
Si PO3 Allan Maglangit nga nahinabi sa Banat News miingon nga kuyog sa kapuyo nga babaye ang biktima nga naglakaw sa maong dapit.
Dugang pa niya nga paingon kini sa pagkuha sa gimaneho niining jeepney kay magsugod na unta sa pagpamasahero apan ang wala hiilhing lalaki nga gikasugat ang kalit nga namusil niini.
Sa crime scene diin nahagba sa yuta ang biktima maoy ilang nakaplagan ang upat ka mga kabhang sa kalibre 45 nga ilang gituohang maoy gigamit sa maong pagpamusil.