Gipatay atol pagpamista

Gipusil sa ulo patay ang usa ka lalaki nga giingong gisuyaan sa iyang pagpamista sa barangay Sto. Niño siyudad sa Toledo niadtong Domingo sa alas 8:00 sa gabii.

Ang biktima giila sa kapulisan nga si Esmeraldo Madraga, alyas Andot, 38 anyos, minyo ug molupyo sa barangay Arpili lungsod sa Balamban.

Subay sa imbestigasyon sa kapulisan ang biktima niadto sa maong lugar aron sa pagpamista sa iyang amahan nga atua magpuyo sa nahisgutang lugar.

Si SPO1 Praxilo Albeso, imbestigador sa Toledo City Police mitug-an nga niabot ang biktima alas 4:00 sa hapon ug nakig-inom sa usa ka Jose Badayos ug pipila ka higala.

Paglabay sa pipila ka oras dunay tulo ka lalaki nga niabot ug niduol sa biktima ug ang usa niini nibunot og armas ug diretso og pusil sa ulo sa biktima duha ka higayun.

Ang biktima nga naigo sa sentro sa iyang ulo ug laing pinusilan sa kilid sa iyang gusok nahagba kini ug namatay diha diha.

Ang tulo ka mga suspek daling nisibat pahilayo human sa hitabo ug sa pag-abot sa mga pulis naka-recover kini og duha ka kabhang nga bala sa kalibre .45.

Ang kapulisan padayon pa sa ilang imbistigasyon sa motibo sa maong pagpamusil samtang ang patay'ng lawas sa biktima kasamtangang gipahiluna sa St. Francis Funeral Homes ug gitakdang ipa-autopsy.