Cañete gitugutang makabalik

Gihatagan og kahigayonan nga makabalik si Dr. Paulus Marie Cañete sa pagdumala isip presidente sa Mandaue City College apan ubos sa kondisyon nga mohatag kini og accounting sa mga tuig sa iyang pagdumala.

Kini ang gikauyonan nila ni Mayor Jonas Cortes ug Bise Mayor Carlo Pontico Fortuna sa atubangan ni Ombudsman Visayas Director Virginia Palanca Santiago niadtong miaging adlaw.

Ang mao nilang panagtagbo ni Cortes ug Fortuna sa buhatan ni Santiago sa miaging Lunes sa hapon maoy ikaduhang higayon sa ilang panag-atubang nga gitumong alang sa pagsulbad sa   mga reklamo nga gisang-at sa Ombudsman Visayas.

Giinsister ni Cortes nga sa bulan pa sa Disyembre sa miaging tuig nga mi-expire ang kontrata ni Cañete isip presidente sa Mandaue City College sa Ibabao Estancia.

Nunot sa pag-expire sa kontrata ni Cañete maoy gihulip sa mayor si Retired DepEd  Regional Director Susana Cabahug isip caretaker sa MCC.

Dugang nilang gikasabotan gawas sa pagpabalik kang Cañete maoy pagahimoon ang pagpabalik sa orihinal nga komposisyon sa Board of Trustees diin ang mayor maoy chairman niini.

Sa nasayran nga gitangtang ang mayor isip chairman sa board of trustee sa konseho sa bag-ong ordinansa nga gipangamahanan ni Majority Floor Leader  Victor Biano.