Hinabang sa  govt. gisaway

Gisaway sa tigpamaba sa Archdiocese sa Sugbu, Monsinyor Achilles Dakay, ang plano  sa gobiyerno paghatag  og hinabang salapi ngadto sa kabus   sa nasod.

Dunay P5 bilyones  nga  gikatahong ipabaha sa kagamhanan ubos sa Ahon Pamilyang Pilipino (APP) program sa tuyo nga katabangan ang mga kabus sa inadlaw-adlaw niining panginahanglan.

Kini ilabi na nga padayong nisaka ang presyo sa halos tanang palaliton sa nasod, partikular na sa bugas nga maoy nag-unang pagkaon sa mga Pilipino.

Ubos sa maong programa, hatagan og P500 kada buwan ang labing kabus nga mga pamilya, samtang dugang P300 ang madawat sa matag bata nga motungha sa eskwelahan.

Hangtud sa tulo ka bata nga nagtungha kada pamilya ang makapahimulos sa P300 kung kini 85% nga mosulod sa klase matag buwan.

Apan giingong 300,000 lang ka kabus nga mga pamilya sa nasod ang gipaabot nga makapahimulos sa nahisgutang programa sa gobiyerno.

Kini giingong 7% lang sa gikatahong 4.7 milyones ka mga pamilya nga naglisod ug halos dili na makakaon sa matag adlaw.

Gani wala pa mapatuman ang maong programa, nakaangkon na kini og mga pagsaway gikan sa nagkadaiyang sektor ug individual diin usa na niini si   Dakay.

Pabiling nagtoo si Dakay sa panultihon nga ang tawo makakaon lang anang adlawa kung kini hatagan og isda, apan kung kini tudluan unsaon sa pagpangisda, kini makakaon og isda sa tibuok niyang kinabuhi.

Tambag ni Dakay  ngadto sa kagamhanan nga angayang gamiton ang P5 bilyones alang sa malungtarong mga programa ug proyekto.

“Gamiton gyud unta alang sa malungtarong mga programa ba sama sa edukasyon, panguma, panarbaho, ingon ana ba,”sumala pa ni Dakay.