Gisapot sa asawa namusil, 1 patay

Patay ang usa ka lalaki  ug grabe usab nga naangol ang  usa ka negosyanteng babaye nga gipamusil sa miaging gabii sa sitio Soliva sa barangay Cotcot, lungsod sa Liloan.

Ang namatay mao si Teodoro Casas Capuyan, 51 anyos, biyudo nga taga barangay Tabok, dakbayan sa Danao samtang kritikal   si Adoracion  Valencia Abaigar, 46 anyos,   negosyante sa barangay Guiwanon sa lungsod sa Compostela.

Ang suspetsado nga namusil sa mga biktima mao si Metodio Bughaw,  nga lumolupyo sa maong dapit sa lungsod sa Liloan.

Sa imbestigasyon ni SPO1 Dennis Malinao   naabtan sa suspetsado  ang mga biktima nga didto usab sa maong dapit ug kalit lang nga namusil.

Dugang pa niya nga daan na nga naghambin og kasuko ang suspetsado nga nahiuli sa ilang panimalay sanglit giaway kini sa asawa gumikan sa pangabubho.

Matud pa ni Malinao nga ilang gidala ang nag-away nga magtiayon sa ilang buhatan ug namauli human sa gihimo nilang paghusay.

Sa paglabay sa pipila ka oras laing alarma nga ilang nadawat sa mao gihapong dapit nga naglambigit gihapon sa suspetsado kinsa kalit lang nga namusil sa mga biktima ug dali nga misibat pahilayo sa maong dapit.