Nasukong gisaway ang gilutong iro gipatay

Nadunggaban patay ang usa ka lalaki nga nasuko ug maoy gikatahong nanguna sa pagpanunggab ngadto sa silingan niini nga nanaway sa iyang dili maayong pagkaluto sa karne sa iro.

Nahitabo kini didto sa Lower Calahuan lungsod sa Minglanilla, Cebu niadtong Domingo sa alas 6:30 sa gabii.

Ang biktima giila sa kapulisan nga si Allan Badayos, 39, molupyo sa nahisgutang lugar samtang ang gitumbok nga suspek mao ra usab ang iyang barkada nga usa ka Arnold Basabe.

Matod ni SPO1 Romeo Barde, imbestigador sa Minglanilla Police Station dihang nahinabi sa Banat News nag-estorya si Basabe ug usa ka Ramonito Cabatuan niadtong higayuna dihang kalit nga niabot ang biktima.

Kalit lang gidunggab sa biktima si Basabe sa kutsilyo sa walay igong hinungdan ug nitaup kini sa ibabaw nga bahin sa dughan sa suspek.

Gipugos pag-ibot ni Basabe ang nagtaup nga kutsilyo samtang natumba si Badayos nga iyahang napatiran tungod sa kahubog ug dihang naibot kini gibadlong kini ni Cabatuan nga dili na mobawos apan nagkisi-kisi si Basabe ug nasamdan na hinoon sa bukton si Cabatuan maong iya nalang kining gipasagdan.

Gidunggab sa makadaghan nga higayun ni Basabe ang biktima sa kalawasan ilabina sa tiyan ug dughan.

Matod ni SPO1 Barde subay sa gihimo niining pagsukit sukit sa asawa sa biktima nasuko kini dihang gisaway sa iyang mga barkada ang iro niining giluto human usab siya sugoa sa wala pa ang hitabo pagpaluto sa giihaw nilang iro alang sa barkada nila nga nag-birthday niadtong tungura.