Kadaugan sa Mactan gidugok

Nagmalampuson ang    Kadaugan sa Mactan nunot sa ika 487  ka  tuig sa pagsaulog niini kagahapon sa buntag didto sa Mactan Shrine sa Barangay Mactan dakbayan sa Lapulapu.

 Sa maong paglakbit sa kasaysayan gibanabana sa kapolisan sa Lapulapu nga dili mominos sa 5 mil ka tawo ang misaksi sa maong reenactment sa away tali nila ni Datu Lapulapu nga ang nagdala sa papel mao ang pambansang kamao nga si Manny  Pacquiao ug sa papel ni Magellan  nga  si Dennis Trillo samtang si Jinky Pacquiao usab ang midala sa papel ni Reyna Bulakna.

 Lakip usab sa pinasidunggang dinapit mao si Executive Secretary Eduardo Ermita nga maoy mirepresentar ni Pres. Gloria Macapagal Arroyo.

 Atol sa binakbakay ni Lapulapu ug Magellan sa lapyahan sa Mactan Shrine gibati og kakapoy si Pacquiao gumikan kay dugay kaayo natumba si Trillo sa ilang panag-engkwentro.

 Matud pa ni Pacquiao nga wala kini niya panumbalinga gumikan kay iyang gibutang mismo sa iyang kaugalingon ang kinabuhi ni Lapulapu nga sama kaniya mibarog aron paglaban sa nasud bisan pa sa milabay'ng away nila ni Juan Manuel Marquez daghan ang mokwestiyon niini.

 Giangkon ni Pacquaio nga kausa ra siya nagbansaybansay sa papel ni Lapulapu, maoy usa sa hinungdan nga dugay niyang napatumba si Magellan nga gidala ni Trillo.

 Samtang si Jinky Pacquiao usab sa iyang bahin dako niyang garbo nga siya ang napili nga modala sa papel ni Reyna Bulakna gani atol sa reenactment kagahapon wala siya maglisod sa pagdala sa iyang papel isip asawa ni Lapulapu.

 Si  Trillo usab mipadayag nga dili sayon  alang kaniya ang  pagdala sa papel ni Magellan gumikan kay wala kini makabansaybansay ug on the spot ang gihatag kaniya nga  himoon atol sa maong away.

Hinuon dako  niya nga garbo nga siya ang napili nga modala sa papel ni Megallan gumikan kay una kining higayon nga midala siya og papel sa usa ka tinud-anay nga kasaysayan sa Pilipinas diin si Lapulapu maoy unang National Hero sa mga Pilipino.

 Ang maong kalihukan gisaksihan usab kini nila ni Consul General of Republic of China nga si Her She Jing, Philippine Reclamation Authority Chairman Adrea Domingo, Kongresista Raul del Mar,   Mayor Jonas Cortes sa Mandaue, PRO 7 Regional Director   Chief Supt. Ronald Roderos ug ang amahan sa maong kalihukan nga kanhi Bahug-bahog sa Mactan David “Boy” Odilao Jr.