Hapon naghikog sulod sa balay

Patay na nga napalgan ang usa ka Hapon diha sulod sa balay nga iyang gipuy-an kinsa giingong naghikog tungod sa problema sa pinansiyal niadtong Biyernes sa gabii diha sa sitio Dawis, barangay Tabunok, dakbayan sa Talisay.

Ang polis nga miresponde ang nakakuha og unom ka pahinang suicide notes nga dunay nagkalaing-laing petsa, tunga sa botelya nga brandy, duha ka baso ug tulo ka identification cards.

Si Shoji Uemura, 61-anyos, temporaryong nagpuyo sa lugar ang napalgan ni PO2 Leandro Azarcon sa homicide section sa kapolisan sa Talisay, konsehal sa barangay nga si Romulo Cabuenas ug mga tanod niini nga naglingkod diha sa sawog sa sala sa balay kinsa ang liog niini adunay higot nga pisi ug ang pikas tumoy gihigot ngadto sa poste sa jalousie.

Si Azarcon sa pakighinabi niini sa Banat News kagahapon sa hapon mibutyag nga iyang gituohan nga kabahin sa problemang pinansiyal ang hinungdan sa paghikog ni Uemura.

Gibutyag ni Azarcon ang ubang nakasuwat sa suicide note ni Uemura nga nagkanayon “To Blenda, please contact my friends Mr. Goto, Mr. Ota, but text to them that Uemura dead by suicide  April 14 early morning and text my daughter” apan gikarasan ang maong petsa ug giilisan og April 20, 2008 ang petsa.

“I want to barrow money and open business but that money was illusion no future of us, I can’t endure my further at the miserable life and must forgive selfishness. I think is that current life continued and if alive work? And I don’t like obstruct person of your family,so I leave from this world”.

Sa wala pa mahitabo ang insidente sa alas 2:00 sa hapon sa maong adlaw, ang kapuyo ni Uemura nga si Mae Montemayor, 19-anyos, uban sa iyang mga igsoon ug walo ka buwan nga anak ang nananghid sa Hapon nga moadto sa barangay Inayawan, dakbayan sa Sugbo.

Apan pagka-alas 4:30 sa hapon sa maong adlaw sa ilang pagbalik nahibulong na sila nga lock na ang gate sa ilang gipuy-an ug walay mangabli bisan og giunsa nila kini og toktok.

Sa kabalaka nga dunay nahitabo ni Uemura diha sa sulod sa balay gitawag nila si Cabuenas ug ang maong konsehal ang mitawag na sa polis. 

Sila si Azarcon, Cabuenas ug ang mga tanod ang miguba sa bintana sa balay aron sila makasulod ug maoy ilang nakita ang Hapon sa nahisgutang posisyon.

Ang kapolisan sa dakbayan ang nangayo usab og ayuda sa Scene of the Crime Operation (SOCO) sa pagpahigayon og imbestigasyon sa maong insidente.

Si Azarcon midungag nga ang Hapon ug ang kapuyo niini walay nahitabong bangi apan usa ka semana ang milabay si Uemura ang miadto sa Manila ug sa pagbalik niini dinhi sa Sugbo nabantayan sa iyang kapuyo nga hilom na kaayo kini ug kung sitahon ni Montemayor kung aduna ba kini problema motubag lang kini nga “okay lang siya”.

Si Montemayor ang lumad nga taga Barangay Paraiso, Sagay City , Negros Occidental ug nagkita kini ug ang Hapon didto sa Angeles City, Pampanga niadtong tuig 2006.