Giluba sa igsuon

Giunay og dunggab ang usa ka lalaki sa iyang  manghud nga nakainom ug nasuko nga gibadlong sa sitio Daan Lungsod barangay San Juan lungsod sa Pilar Isla sa Camotes niadtong Huwebes sa alas 8:00 sa gabii.

Ang biktima giila nga si Pepito Bulahan, 32, molupyo sa sitio Pelayo barangay Esperanza sakop sa maong lungsod.

Samtang ang gitumbok nga suspek mao ra usab ang iyang manghud nga si Ricardo Bulahan, molupyo gihapon sa nahisgutang lugar.

Subay sa imbestigasyon sa kapulisan ang biktima ug ang suspek nagkuyog nga nitambong og birthday party sa ilang higala sa barangay Villahermosa.

Sa ilang pagpamauli nagkalalis ang biktima ug ang kuyog nilang pag-umangkon nga si Rolly Amoroto maong gibadlong kini sa suspek.

Apan gikasuko kini sa biktima ug nanghagit og sukmagay hinungdan nga mibunot kini sa gisulebit nga Batangas knife ug gidunggab ang biktima ug naigo kilid sa iyang tiyan.

Daling gidala sa Pilar health center ang biktima apan gibalhin kini sa Ormoc City Hospital samtang ang suspek boluntaryong nitahan sa iyang kaugalingon sa kapulisan.