Lima sikop sa buy bust sa PDEA-7

Lima ka tawo duha kanila mga babaye ang nasikop sa anti-illegal drugs operation sa Philippine Drug Enforcement Agency-7 niadtong milabay'ng gabii  diha sa utlanan sa barangay Calajuan ug Pakigne, Minglanilla.

Giila ang gidakop mao ang magtiayong sila si Buenaventura Billondo, 44, ug Ladyvina,40; Arnito Alipin, 30; Julius Canales, 35 ug Debrah Zosa, 27,  pulos mga residente sa Upper Pakigne sa nahisgutang barangay.

Ang grupo ni SFO3 Prescillano Gingoyon sa PDEA nakadawat og impormasyon nga dunay usa ka tawong giila lang sa ngalan nga Anot ang nagbaligya og mga drogas sa maong dapit.

Si Anot nakit-an diha sa sulod sa balay sa mga Billondo maong ila kining gipalitan unta og tulo ka paketeng shabu apan gikatahong ang magtiayon ang gisugo niini paghatud sa tulo ka paketeng shabu ngadto sa mga ahente ug dihang gidakop ang duha dali kining miikyas.

Atol sa pagdala sa mga ahente sa magtiayon gipunsisukan nila ni Alipin, Canales ug Zosa ang dapit ug giingong kadudahan ang ilang mga lihok maong sila giapil og rekisa.

Nakuha gikan kang Alipin ang tulo ka paketeng may sulod nga gidudahang shabu; duha ka pakete usab kang Canales ug drug paraphernalia ang kang Zosa.