300 ka punoan sa MJ giibot

Usa ka tawo ang gidakop samtang kapin 300 ka punoan sa marijuana ang naibot sa mga sakop sa Philippine Drug Enforcement Agency kagahapon sa buntag diha sa sitio Mayana sa barangay Gaas sa lungsod sa Balamban.

Gidakop giilang si Eutorlito Cinco, 46, residente sa maong lugar kinsa naaktuhang namisbis sa mga gitanom nga mga marijuana atol sa pag-abot sa mga sakop sa Philippine Drug Enforcement Agency-7.

Si Jessie Tabanao ang luyo-luyong tigpamaba sa PDEA-7 mitug-an sa Banat News nga nakadawat sila og report gikan sa usa ka impormante kabahin sa plantasyon sa marijuana sa maong dapit.

Tuod man dihang ilang giadto kagahapon human sa duha ka kilometrong lakaw sa kabukiran sa maong dapit gikan sa dalan nasakpan sa akto si Cinco.

Naibot sa PDEA-7 ang gatusang punoan sa marijuana ug mga semilya niini nga gibuwag-buwag og tanom uban sa mga kakahuyan sa maong dapit.

Matud pa nga gituyo kini nga ginagmay ang pagkatanom aron dili daling masigpatan ug madudahan sa mga awtoridad.

Sumala pang Tabanao dunay tulo ka mga nananom usab ang nakadagan palayo human mamatikding dunay mga tawo nga nagpahipi sa palibot.

Giila sila mao si Antonio Salvacion; Jemar Cinco ug Ronald Cinco nga pulos residente sa maong dapit ug kabanay sa nadakpan. Matud pang Tabanao bisan nakaeskapo ang tulo ila gihapon kining apilon sa pagkiha.(Edwin Ian Melecio)