Anak gipadakop sa papa

Anak nga gipadakop sa amahan kay nanghasi nakuhaan hinuon og shabu sa iyang posesyon didto sa barangay Cogon, Cruz dakbayan sa Danao sa milabay'ng gabii.

Ang gidakop sa kapolisan mao si Mark Niel Remegio, 24, ug residente sa maong dapit.

Matod pa ni SPO4 Teofilo Deguilmo ang  desk  officer sa kapolisan sa Danao nga usa ka Nelson Remegio (amahan sa suspetsado) mitawag sa ilang buhatan ug  nagpatabang  gumikan kay hubog si Mark ug nanghasi   sa ilang panimalay.

Gumikan niini, miresponde sila ni SPO1 Jaime Meca ug SPO1 Luis Perales sa maong dapit ug ilang nasikop si Mark nga nagpadayong nanghasi ngadto sa iyang mga ginikanan.

Sa dihang nagsingabot ang mga sakop sa kapolisan kalit gilabay ni Mark sa yuta ang usa ka gamay'ng pakete sa gituhuang shabu ug nakumpiskar kini sa mga miresponde nga pulis.

Atol usab sa pagkadiskubre sa maong drugas diha usab ang amahan niini nga si Nelson ug wala kini mopadayag sa iyang pagduda nga planted ang maong ebidensiya nga nakuha ngadto sa anak niini nga si Mark.