Edipisyo sa DOH gipagamit sa MCC

Pormal na nga gipagamit sa Mandaue City College (MCC) ang edipisyo sa DOH nga anaa sud sa Eversley Sanitarium and Child Hospital sa Barangay Jagobiao dakbayan sa Mandaue.
Kagahapon si Cebu 6th District Congresswoman Nerissa Soon Ruiz inubanan sa Medical Director sa Eversley nga si Dr. Joel Alvez ug DepEd Mandaue City Schools Division Superintendent Dr. Arden Monesit pormal nga mipahibalo sa mga tinun-an ug sa mga ginikanan nga ang DOH building nga anaa sulod sa  Eversley mao nay ilang mamahimong kasamtangang  lawak saringan sa ilang summer classes human kini  palayasa ni Mandaue  City Mayor Jonas Cortes  sa milabay'ng gabii.

Matud ni Kongresista Ruiz nga kini kasamtangan lamang sulod sa duha ka bulan nilang pagpahigayon sa summer classes, apan misaad kini nga motabang sa paghangyo ni DOH Sec. Francisco Duque nga mahimong lugwayan una kini hangtod sa duha ka tuig.

Gumikan niini si Majority Floor Leader Konsehal Victor Biaño mipasalig usab nga pinaagi sa ilang resolusyon sa konseho sa dakbayan sa Mandaue nga maghangyo kang Sec. Duque nga lugwayan una ang pagpagamit sa ilang edipisyo nga anaa sulod sa Eversley iyaha kining himoon sa daling panahon atol sa ilang sunod nga regular session isip abag ni Cong. Ruiz.

Gikalipay sa mga ginikanan ang maong kalamboan gani ang presidente sa MCC Student Supreme Council nga si Marsmel Caballero dako ang kalipay nila sa mga lakang nga gihimo ni Ruiz sa pagpangita og paagi nga sila adunay kapasilongan sa ilang nagpadayon nga summer class diin napakgang kini human sa pagpatak-op ni Mayor Cortes sa ilang tunghaan sa Ibabao Estancia dakbayan sa Mandaue.

Samtang si Ruiz mipadayag nga dili siya manginlabot sa isyu kung kinsa ang modumala sa maong tunghaan ug kinsa ang mamahimong Presidente, ang  hinungdan sa iyang pag-apil sa maong isyu gumikan sa sitwasyon sa mga kabataan human sa ilang nasinati nga trahedya atol sa pagpatak-op sa ilang tunghaan.

Samtang si Dr. Alvez usab mipadayag nga andam ang Eversley sa pagtabang sa mga tinun-an sa MCC nga nawad-an sa ilang lawak saringan ug posibleng motabang usab siya sa paghangyo ni Sec. Doque sa paghatag ug lugway sa mga tinun-an nga makagamit sa maong edipisyo. (Bong Soriano)