Coastal clean-up sa Lapu malampuson

Nagmalamposon ang gihimong coastal clean-up ug underwater beach clean-up nga gihimo sa kagamhanang lokal sa dakbayan sa Lapulapu nunot sa ikatulong adlaw sa selebrasyon sa Kadaugan sa Mactan ug sa Earth Day.

Matud pa ni Konsehal Queenie Malingin Ahman, chairman sa maong kalihukan, nga sugod sa alas 6 kagahapon sa buntag duha ka area ang nagpahigayon sa coastal clean up diin ang usa ka grupo nanglimpyo sa kabaybayunan sa Mactan Shrine ngadto na sa barangay Punta Engaño lahos na ngadto sa  Barangay Marigondon ug kini pinaagi sa pipila ka mga barangay officials ug mga residente

Gisundan usab kini sa grupo sa mga divers sa Philippine Navy, Philippine Coast Guard ug mga pribadong mga dive shops nga mibulontaryo usab sa pagpanglimpiyo sa ilawom sa kadagatan sa isla sa Olango.

Kuhaon sa mga divers ang mga hugaw nga anaa ilawom sa kadagatan nga ngil-ad tan-awon sa mga langyaw nga buot mosaksi sa maanindot nga talan-awon ilawom sa kadagatan diin maoy usa sa nagbaniog sa tibuok kalibutan nga usa ka “underwater paradise.”

Matud pa ni Malingin nga lakip sa ilang gilimpiyohan mao ang ilawom sa kadagatan sa Sta. Rosa, Talima, Baring ug Tingo sa isla sa Olango.

Matud pa ni Konsehal Damian Gomez, chairman sa Committee on Tourism Affairs sa dakbayan sa Lapulapu nga bisan pa nga wala mahinayon si Kim Atienza, anak ni DENR Sec. Lito Atienza gumikan sa susamang kalihukan sa Earth Day didto sa kaulohan, apan mapasalamaton kini nga ang mga taga-Lapulapu, mga opisyal sa barangay ug militar misanong sa ilang kalihukan atol sa ikatulong adlaw sa Kadaugan sa Mactan nga nagmalamposon nga walay mga kakulian nga nanghitabo.