Bata gipusil sa Crips patay

Usa ka minor de edad nga sakop sa Bloods gang namatay samtang naangol usab ang duha ka kauban niini human gipusil sa mga sakop sa Crips gang mga alas 2 pasado sa kadlawon kagahapong adlawa diha sa Private Road, P. Del Rosario Extension, barangay Sambag 1 ning dakbayan.

Ang namatay nang nadangat sa Cebu City Medical Center (CCMC) giila sa kapolisan nga si Gerald King, 17, nga taga P. del Rosario, Riverside, Sitio San Roque sa nahisgutang barangay, human makaangkon og samad pinusilan sa iyang tuong bahin sa lawas ingon man walang bahin sa lubot. Samtang ang kauban niining naangol mao sila si Noel Labines, 30, walay trabaho nakaangkon og samad sa iyang walang bahin sa lubot, ug Kenneth Labiaga, 18, nakaangkon og samad sa iyang tuong kamot nga pulos silingan sa namatay.

Sa imbestigasyon nila ni SPO1 Rogelio Nedamo ug mga kaubanan sa Cebu City Police Office duha ka wala mailhing sakop sa Crips ang namusil sa mga biktima.

Matud pa nga ang mga biktima naglakaw niadtong higayona uban sa ilang mga higala sa dihang ang mga kaaway kalit lang mibutho nga nagdala na og pistola ug sa walay daghang pangutana namusil kini ngadto kanila makadaghang higayon.

Human sa pagpamusil ang duha ka sakop sa Crips daling nisibat sakay sa usa ka Ken taxi nga naghuwat na niini nga mipaturatoy sa pagdagan paingon sa V. Rama Avenue.

Wala na kini maabti pa sa duha ka mga mi-responding sakyanan sa Mobile Patrol Group samtang ang mga biktima gidali sa CCMC apan walay suwerte ang minor  de edad gumikan kay dead-on-arrival kini sa maong tambalanan.

Ang hepe sa Cebu City Police Office, Sr. Supt Patrocinio Comendador nagkanayon nga mga sakop sa street gang ang mamumuno sa bata.

Gani sa pagkakaron ila nang gilihok ang pag-ila sa maong grupo pinaagi sa pagpakitag mga hulagway ngadto sa mga testigos sa maong krimen.