Petisyon sa anti-Tañon gibasura sa Comelec

Gibasura sa Commission on Elections (Comelec-Manila) ang hangyo sa Save Tañon Strait Citizens Movement alang sa sayo nilang pagparehistro.

Sa iyang tubag giklaro ni Jose Tolentino, executive director sa Comelec, nga logistical considerations maoy hinungdan sa kalangay nila pagpasiugda sa continuing registration.

Partikular na niini ang paghatod sa mga registration forms ngadto sa nagkadaiyang mga buhatan sa Comelec sa tibuok kapupud-an.

Gawas niini niingon si Tolentino nga ayuhunon pa usab ang ubang data capturing machines sa Comelec nga maoy gamiton sa pagrehistro.

Ang law professor sa University of Cebu ug sakop usab sa Save Tañon Strait Citizens Movement, Atty. Gloria Ramos, maoy mipadangat og suwat-hangyo ngadto sa Comelec-Manila.

Buot ni Ramos nga makaparehistro unta kagahapong adlawa ang iyang mga kauban sa grupo isip tipik sa ilang kalihukan subay sa kasaulugan sa Earth Day.

Giinsister ni Ramos ang section 8 sa Akta Republika 8189 (System of Continuing Registration of Voters) nga matag adlaw ipahigayon ang pagpangrehistro.

Apan gipadayag ni Tolentino bisan og ilang gihangop ang katuyoan ni Ramos ug kaubanan, dili pa kini karon mahimo sa Comelec tungod sa nahisgutang mga katarungan.

Taliwa niini, nagpanon gihapon kagahapon sa Cebu City Comelec Office ang mga kauban ni Atty. Ramos ug miduso sa ilang petisyon.

Lakip na niini ang mga sakop sa Clean Air Youth Alliance ug Fisherfolk Development Center (FIDEC) nga giingong nagpakabana usab sa kalikupan.

Gidawat hinoon ni Cebu City North District Election Officer Marchel Sarno ang giduso nga petisyon sa nahisgutang mga grupo.

Apan gipahibawo na hinuon ni Tolentino nga unya pa sa Hulyo 1 pormal nga magsugod ang continuing registration lukop nasud nga alang sa umaabot nga 2010 elections.