Naangol ang drayber sa usa ka cargo truck sa dihang aksidente kining natagak sa walog nga gibanabanang dunay sobra sa 10 metros ang gilawmon sa kurbadahon nga dapit didto sa Sitio Cantayocan, barangay Bungon, lungsod sa Tabuelan niadtong Sabado sa alas 9:30 sa gabii.
Ang drayber sa maong cargo truck giila sa kapolisan nga si Jose Romar Romanes, 30, ulitawo, molupyo sa Tinantaan, Negros Occidental.
Matud ni PO1 Gilbert Allego sa Tabuelan Police Station sa dihang nahinabi sa Banat News gikan dinhi sa siyudad sa Sugbo ang maong cargo truck nagbiyahe paingon sa Negros apan paghiabot niini sa maong kurbadahon nga lugar gikasugat niini ang 10-wheeler Isuzo Fuso drops nga gimaneho sa usa ka Robel Pagasian, 23, ulitawo ug molupyo sa dalan Borromeo dinhi sa dakbayan sa Sugbo.
Subay sa imbestigasyon sa kapulisan gitug-an ni Romanes nga samtang nagkasugat sila sa maong 10-wheeler truck kalit nga miabli ang pultahan niini ug tungod sa kahadlok nga masangit ang iyang gimaneho nga sakyanan gilihayan niya kini apan aksidente nga didto siya nipaingon sa walog ug nahulog.
Si Romanes nakaangkon og samad ug mga pangos sa iyang kalawasan human naapil og katagak apan luwas na sa peligro human madali og dala sa tambalanan.
Samtang ang cargo truck nga gimaneho niini nakaangkon og dakong kadaut ug sa paghimo ning balita wala pa kini makuha gikan sa walog nga natagakan niini.