Misis gipusil sa nangabubhong bana

Usa ka bana mipusil sa iyang asawa  nga iyang gipangabubhoan sa miaging gabii didto sa ilang panimalay sa sitio Kalubian sa barangay Yati, lungsod sa Liloan.

Ang napusilan nga asawa mao si Elsa Pepito, 40,  ug ang nakapusil nga bana mao si Alex Pepito, 50.

Si PO3 Ricardo Enriquez nga nahinabi sa Banat News miingon nga hubog si Alex ug gituohang naggamit kinig ginadiling drugas sa dihang nahitabo ang pagpamusil.

Dugang pa niya nangabubho si Alex  ngadto sa iyang asawa nga maoy hinungdan sa nahitabong panaglalis.

Taliwala sa  mainitong panaglalis, si Alex nga nakakuha og airgun  wala magpanuko sa pagpusil ug naigo ang bitiis sa iyang asawa.

Dali nga gidala sa mga kabanay si Elsa ngadto sa Mactan Doctors Hospital sa  Basak, dakbayan sa Lapulapu ug padayon  kining giatiman sa mga doktor.

Dugang pa ni PO3 Enriquez nga nadakpan    si Alex sa kapolisan.

Si Alex ilang pasakaan og kasong frustrated parricide nga gipalig-on sa ebidensiya nga airgun nga maoy gigamit nga hinagiban nga gitahan usab ngadto sa ilang buhatan sa anak nga lalaki sa maong magtiayon.