Tindahan og mga motor sa Mandaue gi-raid sa PASG

Gironda sa mga sakop sa hiniusang pwersa sa Presidential Anti-Smuggling Group ug Regional Intelligence Office ang usa ka tindahan og mga motorsiklo sa Gate 3 Sacris Extension sa Mandaue City ug gisakmit ang 18 ka mga Korean cars nga gituohang gi-smuggle pagpasulod dinhi sa nasud.

Ang gironda mao ang Song Pa Motors Trading nga giingong gipanag-iya sa usa ka Michael Mengasca kinsa dihang gipangutana ni PASG-7 deputy chief Ricardo “Jojo” Collantes giingong mihimakak nga siya maoy tag-iya kundili tulo ka mga Koreano.

Ang pagronda gihimo pinasikad sa search warrant nga giluwatan ni RTC Judge Geraldine Faith Econg tungod sa paglapas sa Executive Order 156 ni Presidente Gloria Arroyo niadtong 2003 nga nagdili sa pag-import og mga used vehicles.

Si Collantes dihang gihinabi sa Banat News sa telepono mitug-an nga duna silay nakit-ang mga gipapilit nga mga LTO plates diha sa usa ka blackboard (dili sa mga sakyanan sukwahi sa na-report) sa maong tindahan apan wala pa nila matino kung kini gitagana ba aron ipapilit sa mga nahisgutang sakyanan.

Ang mga sakyanan gilangkuban sa Kia Sportage, Hyundai Sonata ug Kia Rio apan wala pa matino ang kinatibuk-ang presyo niini.

Nunot sa pangangkon ni Mengasca nga dili siya maoy tinuod nga tag-iya niini gipaabot nilang moluwat kini og linagdaang kasulatan nga magtumbok sa giingong tulo ka Koreanong maoy tinuod nga tag-iya niini.

Tungod niini hayan mapasakaan og kasong paglapas sa Anti-Dummy Law si Mengasca ug ang giingong mga Koreano kung mapamatud-an, dugang kini sa mga kasong pag-import sa mga nahisgutang sakyanan.

Nasuta usab ni Collantes gikan sa Department of Trade and Industry nga sa pagkuha nila og DTI permit sayo ning tuiga, motorsiklo lang ang gibutang nga ilang iimport ug dili mga four-wheel nga sakyanan.

Ang maong mga  sakyanan naa na karon gibutang sa kustodiya sa Cebu Customs diha sa Cebu International Port Authority.