Bata-bata sa NBI gipusil atubangan sa gate sa NBI

Milapos sa dughan ang bala sa .32  kalibre  nga pistola ngadto sa lawas sa kanhi bata-bata sa National Bureau of Investigation (NBI-7) human gipusil sa duha ka mga tawong nagmotorsiklo mga alas 3  sa hapon niadtong Sabado diha sa atubangan sa gate sa NBI-7 sa barangay Capitol Site, ning dakbayan.

Ang nalandig sa Cebu City Medical Center (CCMC) giila sa kapolisan nga si Richard Apostol,  33, minyo, apan way trabaho nga taga Sampaguita, barangay Banilad, dakbayan sa Mandaue.

Si Apostol nakaangkon og samad pinusilan sa iyang buko-buko nga  milapos sa iyang dughan dihang ang angkas sa nagmotorsiklo maoy  mipusil kaniya makadaghang higayon.

Ang biktima mitug-an sa mga imbestigador sa Homicide Section sa Cebu City Police Office nga niadtong Biyernes sa alas 3  sa hapon padulong na unta siyang mosulod sa gate NBI-7 sa dihang kalit lang mibutho ang duha ka suspetsado nga nagpahinay sa pagpadagan sa Aura nga motorsiklo ug mipauwan kaniya og bala.

Human sa hitabo ang mga mamumuno dali usab kaayong nakasibat palayo sa nahisgutang lugar samtang ang biktima gidali   pagdala sa iyang higala nga si Eldie Tumakmol ngadto na sa tambalanan.

Usa ka ginganlan og “Marjun” nga bata-bata usab sa NBI-7 ang nakarekober sa  tulo ka mga kabhang sa  kalibre .32   nga tua na karon sa posesyon sa NBI-7 ballistician.