NSO balik sa MJ Cuenco

Napakyas ang negosasyon tali sa National Statistics Office (NSO) ug Cebu provincial government  mahitungod sa planong pagbalhin sa NSO sa ilang buhatan diha sa mga luna sa lalawigan diha sa Sudlon, barangay Lahug.

Si NSO Administrator Carmelita Ericta kinsa mibisita dinhi aron pagpahibalo sa kinatibuk-ang population census sa 2007 mibutyag nga napakyas ang isig ka habig nga magkasabot sa tinguhang pagbalhin na sa maong buhatan diha sa nahisgutang dapit.

“It did not push through, I dont want to go into details, but NSO regional office will go full operation in two to three months time, in the same building,” sumala pang Ericta apan wala hinuon maklaro kung unsay hinungdan niini.

Nunot niini hayan posibleng mobalik sa karaang buhatan sa NSO diha sa dalan MJ Cuenco ang ilang paghikay sa mga papeles ilabi na sa rehistrasyon sa mga birth certificates

Kini mipasalig hinuon nga dunay usbong mga pamaagi aron di na usab kini maghuot ug aron usab di na usab kini punsisukan sa mga fixers.

Mipasalig kini na hapsay na unya ang transaksyon sa pagbalik nila og operate sa mosunod tulo ka bulan tungod kay dunay mga dugang personahe nga mo-operate unya sa mga dugang computers nga ilang gamiton aron mas paspas ang proseso.

Gipaabot hinuon nga mas gamay nalang ang moanha unya sa ilang buhatan gumikan kay duna nay mga 36 ka mga NSO offices sa 36 ka mga dapit sa Central Visayas, 21 niini nia dinhi sa Cebu nga maoy mohikay sa mga papeles ug paabuton nalang og lima ngadto sa walo ka adlaw ang resulta.