Mga kapitan patabangon sa NFA retail
Nanawagan karon si ABC president Eugenio “Jingjing” Faelnar sa mga barangay kapitan sa siyudad nga motabang pagpatunhay sa kahapsay diha sa mga NFA retail outlets.
Kini human usab masaksihi ni Faelnar diha sa Taboan Public Market nga padayong naglinya ang mga tawo nga gustong mupalit sa mas baratong bugas-humay gikan sa NFA. Ang Taboan sakop sa barangay San Nicolas-Proper nga ubos sa pagdumala ni Kapitan Edgar Lauron.
Taas gihapon nga linya sa mga pumapalit ang nadungog sa ABC president ngadto sa ubang merkado publiko sa dakbayan nga namaligya og NFA rice.
Partikular na diha sa merkado sa T. Padilla nga gikataho usab nga dunay mga NFA retailers nga dunay gipaburang kustomer niini sa pagbaligya og bugas.
Apan ang labaw nga gikabalak-an ni Faelnar nga mulinya unya og apil sa mga pumapalit ang mga badlongon sa katilingban sama sa snatcher ug mga mangunguot.
“Ang akong gikuyawan nga labnihan o kuotan ba hinoon sila imbes makapalit og duha ka kilong bugas, dili na unya makakaon,” sumala ni Faelnar.
Kini aron mabantayan ang mga pumapalit nga naglinya ug dunay dali usab nga makatubag o makataho ngadto sa kapolisan kun makadawat og alarma.
“Ang ako lang hangyo ngadto sa mga kauban nakong mga kapitan sa siyudad nga butangan lang gyud og mga tanod ang mga NFA retail outlets,” matud sa ABC president.
Wala pa hinuon makadawat og taho si Faelnar nga duna nay nalabnihan o nakuotan sa mga konsumidor nga nilinya sa ilang pagpalit og bugas.
Apan gipadayag sa ABC president nga mas maayong kini mabantayan daan tungod kay giingong nagkalisod na karon ang panahon.
Nagtuo si Faelnar nga dili mawagtang ang paglinya sa mga pumapalit diha sa mga NFA retail outlets hangtud nga duna nay igong suplay sa bugas ang kamerkaduhan.
Nangita na hinoon og mga pamaagi ang nasudnong kagamhanan nga mahatagan na og sulbad ang nasinati karong rice crisis sa nasud.
- Latest
- Trending
