Dalaga gipusil sa tulisan

Kritikal ang kahimtang sa usa ka 27 anyos nga dalaga human pusila sa usa ka tulisan kagahapon  sa alas 9:30 sa buntag diha sa dalan F. Pacaña  barangay Tisa ning dakbayan.

Ang nalandig sa Cebu City Medical Center (CCMC) giila sa kapolisan nga si Cherry Lyn Labajo, empleyado sa usa ka cellphone shop  ug residente sa Pearl  Extension  Sta. Teresita Village, sa nahisgutang barangay.

Sa imbestigasyon nila ni SPO4 Alex Dacua   sa Homicide Section sa Cebu City Police Office (CCPO) ang inahan sa biktima nga si Mila Labajo, misaysay sa kapolisan nga kagahapon sa buntag sa maong takna naglakaw sila sa dalan uban sa iyang anak.

Sa dihang ang usa ka tulisan nga nagdala og armas kalit lang mibutho ug  miilog sa shoulder bag sa iyang anak apan nagdumili kini sa paghatag hinungdan nga gipusil makausa ka higayon.

Naigo ang tuong kamot niini nga  milapos ngadto sa iyang tuong bahin sa lawas.

Ang inahan sa biktima nakahimo pa sa pag-ilog pagbalik sa shoulder bag hinungdan nga ang  tulisan misibat ug misakay sa usa ka motorsiklo nga nagpaabot   sa usa ka gasoline station sa maong lugar. Ang biktima gidali   pagdala sa CCMC.