75-anyos mi-rape sa bata gisikop

Gidakop ug nagtingkagol na karon sa bilanggoan ang usa ka 75-anyos nga lolo tungod sa kasong pagpanglugos  didto sa lungsod sa Catmon.

Ang suspek nga si Cristino Perez alyas Tinong, 75,  usa ka balo ug molupyo sa barangay Macaas sakop sa maong lungsod.

Matud ni SPO3 Romulo  Toralba sa Catmon Police Station dihang nahinabi sa Banat News gidakop nila ang suspek niadtong Miyerkules sa alas 4  sa hapon.

Kini human malutsi og warrant of arrest sa kasong rape in relation to RA. 7610 nga gipirmahan ni RTC Judge Edito Enemesio ug walay piyansa nga girekomendar alang sa temporaryong kagawasan niini.

Nasayran gikan kang SPO3 Toralba nga ang suspek gipasakaan  og kaso tungod sa paglugos niini sa iyang silingan nga dalagita nga nagpangidaron pa og 13 anyos niadtong  milabay'ng tuig apan karon lang bag-o nalutsan og warrant.

Ang suspek nabalhog karon sa detention cell sa Catmon Police samtang nagpaabot sa husay sa kaso niining giatubang.