Utok sa tawong grasa migawas human maligsi

Migawas ang utok sa usa ka tawong grasa human malatayi sa ligid sa tulo ka sakyanan alas 12 pasado ang takna sa miaging tungang gabii sa dalan Ouano Avenue sa reclamation area sa dakbayan sa Mandaue.

Si SPO1 Apolinario Niez, imbestigador sa traffic section sa Mandaue City Police Office (MCPO) nga nahinabi sa Banat News miingon nga naglingkod sa taliwala sa dalan ang wala hiilhing lalaki dihang nasakdapan sa usa ka kolor itom nga awto.

Apan wala kini hunungi hinungdan nga ang nagsunod nga usa ka color gray nga FX nga sakyanan mao na say nakaigo kaniya ug  nasundan pa gyud kini og kaigo sa usa ka kolor blue nga awto.

Gumikan niini maayong pagkagusbat sa ulo ug kalawasan sa biktima ug wala na kini kaabot nga buhi sa Mandaue City District Hospital ug hangtud karon wala pa gihapon mailhi.

Matud pa ni SPO1 Niez usa ka Michael Pilapil Caang,23 anyos nga taga San Pedro Cui sa dakbayan sa Bogo maoy bugtong nakasaksi sa maong hitabo miingon nga naglingkod sa taliwala sa karsada ang biktima dihang kini naigo sa sakyanan.

Gikatahong ngitngit kaayo ang maong dapit maong wala kini mabantayi sa drayber.