Loot diskompiyado sa NBI

Diskompyado ang mga opisyal sa lungsod sa Daanbantayan, Cebu kun ang nasikop sa National Bureau of Investigation (NBI)-7  nga suspek sa pagpatay sa magpapatigayon nga si Renerio “Gogong”Arrogante nga si Sgt. Moises Ludoc mao ba gyud ang tinuoray nga responsable sa krimen.

Gibutyag ni  Bise Mayor Maria Luisa Loot, chairman sa Committee on Peace and Order Council sa konseho sa Daanbantayan mohimo  sila og makuting imbestigasyon.

Matud niya nga nakadawat sila og impormasyon nga duty didto sa Negros Occidental si Sgt. Ludoc dihang nahitabo ang pagpusil patay ni Arrogante sa tindahan niini sa Mainroad Square nga nahimutang sa Poblacion niadtong Marso 9 sa milabay'ng buwan.

Gisubay usab sa bise mayor ang tabi-tabi nga ang kapitan sa barangay Bateria nga kontra sa ugangan ni Sgt Ludoc nga napilde pagka kagawad sa milabay'ng eleksyon niadtong Oktobre maoy nagtumbok  sa sakop sa Philippine Army.

Gipasalig hinuon ni Loot nga andam silang mga opisyal sa Daanbantayan paghatag  og  P50,000 nga ganti  kun maseguro nga mao gyud kini ang suspek sa pagpatay kang Arrogante.

Gipadayag sa bise mayor nga duna gihapoy sagol pamolitika ang pagkasikop ni Sgt. Ludoc gumikan kay gitawagan siya sa iyang kanhi kagawad sa barangay Bateria ug nangayo kini og tabang human gidakop sa NBI ang pag-umangkon niini ug maoy gipasanginlang mipatay kang Arrogante.

Si   Sgt. Ludoc gidakop sa NBI-7 sa miaging adlaw diha sa barangay Taboc, siyudad sa Mandaue kauban ang iyang asawa ug duha ka anak nga nanaog sa usa ka bus de pasaheroan gikan sa Daanbantayan paingon dinhi sa dakbayan sa Sugbu.