2FTP wa moresponde susihon
Ipaubos sa imbestigasyon sa Cebu City Police Office ang duha ka mga sakop sa Field Training Program (FTP) human napakyas sa pagresponde kagahapon sa alas 4 sa buntag sa nahitabong pagpamusil diha sa may eskina Colon ug Pelaez barangay Kalubihan.
Gipahibalo ni Supt. Pablo Labra II ang deputy city director for administration sa CCPO nga ilang ipaimbestigar sila si PO1 Jayson Sarsada ug PO1 Rosario Quedeng nga sakop sa night shift.
Giklaro niini nga angayang mopasabot ang duha kun nganong wala kini sila makaresponde sa nahitabong pagpangulata, pagdunggab ingon man pagpusil sa biktimang construction worker nga si Joselito Laurente, 30, nga taga Bunga, Lutopan ,
Ang lugar nahitaboan ubos sa area of jurisdiction sa duha alang sa night watch beat patrol apan wala makaresponde bisan ug nagkaguliyang ug aduna pa gyoy buto sa armas.
Ilang pahamtangan sa tukmang silot kini kun masuta nga adunay pagpabaya sa trabaho. Samtang gitataw usab niini nga maapektuhan gyud ang performance sa duha ka FTP sa ila unyang evaluation.
Nasayran nga naluwas sa tinong kamatayon si Laurente nga nalandig sa Cebu City Medical Center human makaangkon og samad pinusilan sa tiyan nga milapos sa buko-buko ingon man samad dinunggaban sa tuong bukton. Ang biktima miasoy sa mga imbestigador nga naglakaw siya uban sa iyang amigo nga ginganlan lang og “Bobby” dihang nahitabo ang krimen.
- Latest
- Trending
