Sgt. Ludoc nasaypan ra

Dako ang pagtuo sa mga sakop sa militar  nga "mistaken identity" lang si Sgt. Moises Ludoc, ang  gipasanginlang mipusil patay sa magpapatigayon nga si Renerio “Gogong” Arrogante niadtong Marso 9 sa milabay’ng buwan diha sa lungsod sa Daanbantayan ug gisikop sa National Bureau of Investigation sa miaging adlaw.

Ang tigpamaba sa Central Command, Major Samuel Sagun, mibutyag atol sa  pakighinabi sa mga tigbalita nga kagahapon sayo sa buntag nakadawat siyag text message gikan kang Lt. Col. Franco Nemesio Gacal, Batallion Commander sa 11th IB Charlie Company nga nagbase sa lungsod sa Isabela, Negros Occidental nga duna kini gipadalang duha ka sundalo dinhi sa dakbayan sa Sugbu kagahapong adlawa ug nagdala og mga dokumento agi'g suporta sa pangangkon ni Sgt.   Ludoc nga siya  mi-duty niadtong Marso 9 dihang nahitabo ang pagpusil patay kang Arrogante.

Matud ni Sagon usa sa mga gidala sa duha ka sundalo nga dokumento mao ang logbook nga anaa sa command post si Ludoc didto sa Isabela,  Negros Occidental sa dihang gipatay ang negosyante. Gani dunay certification nga pinirmahan sa guard on detail sa 11th Infantry Batallion Charlie Company.

“Mao ni ang gibuhian nga statement sa 11th IB, it could be the case of mistaken identity,” pasabot pang Sagun.

Mipasabot si Sagun nga ang baruganan sa Central Command (Centcom) dili nila kondinahon ang mga dautang binuhatan sa ilang mga sakop kun  ugaling makahimo man og sayop apan gitataw niini nga  ang kaso ni  Ludoc gikinahanglan pang i-probar kun  siya usa ka dakong sad-an o inosente sa maong  krimen.

“Duna siyay (Ludoc) constitutional right, bahala na ang korte sa maong kaso," si Maj. Sagun nagkanayon.