'Mipatay' ni Arrogante sikop

Nasikop kagahapon sa mga operatiba sa National Bureau of Investigation ang usa ka sundalo nga gipasanginlang mipusil patay kang Renerio “Gogong” Arrogante nga giilang kontra sa politika sa mga Loot sa Daanbantayan.

Ang nasikop kagahapon sa barangay Taboc, dakbayan sa Mandaue mao si Sgt. Moises Ludoc, 33, taga Bateriya, Daanbantayan ug sakop sa 11th Infantry Battalion apan kasamtangang nagtuon sa 3rd Army Training Group sa Camp Lapulapu.

Si Sgt. Ludoc nga sakop sa Philippine Army gikuyogan sa iyang kapikas ug duha ka anak gikan sa Bateriya paingon unta sa dakbayan sa Sugbo aron mo-loan sa Pag-ibig.

Matud pa ni Atty. Jose Ermie Monsanto, imbestigador sa NBI-7, nakadawat sila og impormasyon nga bag-o pa’ng gikan sa Bateriya si Sgt. Ludoc gikan sa isla sa Negros upat na ka adlaw ang nakalabay.

Gipadala gilayon ang ‘undercover agent’ sa NBI-7 ug mao kini ang mikonpirmar sa presensiya ni Sgt. Ludoc sa Bateriya.

Ang undercover agent sa NBI-7 mi-text ni Monsanto nga nagpahibalong moanhi sa siyudad si Sgt. Ludoc dala ang iyang pamilya hinungdan nga gilusad ang operasyon sa pagsikop niini.

Wala hinuon mopakita og pagsukol si Sgt. Ludoc sa dihang gidakop sa mga sakop sa NBI-7.

Si Sgt. Ludoc nakuhaan og .38 kalibre nga rebolber, sumala pa ni Monsanto.

Ang sarhento gisikop nga walay warrant of arrest. Apan matud ni Monsanto nga maisip nga hot pursuit ang ilang operasyon pagsikop kang Sgt. Ludoc tungod kay nailhan na siya daan sa mga testigos sa pagpatay kang Arrogante.

Sumala pa sa imbestigasyon sa NBI-7 nga human mapatay si Arrogante, ang mamumuno mibiya gilayon sa Daanbantayan paingon sa Negros. Ang NBI-7 mopasaka og kasong murder ug paghupot og armas nga walay lisensiya.