SK president sa Apas mitubag sa DILG

Mikisikisi ang SK president sa barangay Apas sa report nga napatik ning pamantalaan niadtong Abril 13 nga may kalabutan sa SK nga mapalpak, taktakon.

Ang presidente sa SK sa nahisgutang barangay nga si Jan Nichol Versoza nagpadala og suwat ngadto kang Cebu City DILG director Patricio Gabuya nga maoy tinubdan sa report.

Sa maong balita gipadayag ni Gabuya nga siya nakadawat og taho nga ubay-ubay sa mga SK sa dakbayan ang dili regular nga mopahigayon sa ilang tigom.

Apan gipahibalo ni Versoza ngadto kang Gabuya nga walay basehanan ug dakong sayop ang report sa Banat News   tungod kay giingong matag buwan silang mopahigayon.

Apan gipadayag ni Gabuya nga ang napatik nga estorya sa Banat News nga gikwestyon sa SK sa barangay Apas wala mapun-i ug wala makuha-i ug iyang pamahayag ang tanan.

Gipasabot ni Gabuya nga ang iyang tumong sa iyang pagpangayo og report ngadto sa mga barangay kapitan mao lang ang pagtino sa iyang nadawat nga mga taho.