Gisuyaan, gidunggab patay

Patay na nga miabot sa tambalanan ang usa ka tawo samtang laing naangol atol sa pagpanunggab sud sa KTV sa new Terminal lungsod sa Consolacion.

Ang biktima mao si Roland Lumantao, 19, ulitawo nga residente sa Yati, Liloan ug Michael Sasing, 16, nga residente sa Brgy. Catarman lungsod sa Liloan.

Base sa imbestigasyon ni P/Insp. Leoncio Baliguat Jr. hepe sa Consolacion police station nasayran nga samtang nag-inom si Lumantao kuyog ang iyang mga kauban sa trabaho ug sa dihang mikanta na kini kalit lamang nga mibarog ang usa ka wala mailhing tawo gikan sa pikas lamesa dayong dunggab ngadto ni Lumantao.

Si Lumantao samaran sa iyang tiyan ug gidali pagdala sa Eversly Child and Sanitarium Hospital sa dakbayan sa Mandaue apan gideklarar na kini nga  patay na nga nadangat sa tambalanan samtang ang kauban niini nga si Sasing  nasamdan sa iyang walang bukton sa pagpanagang niini.

Nagtuo si Insp. Baliguat nga gumikan sa suya-suya sa kanta sud sa videoke  ang  hinungdan sa maong  hitabo.

Sa padayong pakisusi sa kapolisan sa Consolacion nasayran nga    ang suspetsado   migamit sa 19 ka  pulgadas nga gitas-ong kutsilyo nga maoy gigamit pagdunggab sa duha ka biktima.