Miabuso sa job order sa Talisay gitaktak – Bro Soc

Pormal na nga gitaktak sa serbisyo ang hepe sa Parks and Playgrounds ug kauban niini human kini giakusan sa kasong sexual harassment sa usa ka job order nga empleyadong babaye.

Matud pa ni Talisay City Mayor Socrates Fernandez human niya madawat ang rekomendasyon gikan sa  10  ka mga sakop sa Committee on Decorum nga maoy nag-imbestigar ni Alberto dela Cuesta, hepe sa Parks and Playgrounds ug Lorte Cabrera, empleyado sa City hall gumikan sa maong kaso, kini mihatag na sa iyang hukom.

Matud pa ni   Fernandez nga base sa rekomendasyon sa komitiba nga gipangulohan ni Atty. Owen Alguso,  City Legal Officer siya wala mosupak sa rekomendasyon niini nga taktakon si dela Cuesta sa iyang katungdanan, samtang si Cabrera gipaubos sa tulo ka bulan nga pagkasuspenso.

Matud pa ni Fernandez nga iyang nakita ang patas nga gihimong imbestigasyon sa maong reklamo sa usa ka job order employee sa Talisay batok sa duha ka suspetsado   hinungdan nga kini ang nakab-ot nga hukom sa Committee on Decorum atol sa ilang gihimo nga nominal votes.

Gitataw usab ni Fernandez nga dili na mausab ang maong insidente ug usa usab kini ka mensahe ngadto sa ubang mga department heads nga dili moabusar sa ilang katungdanan nga magtukmod kanila sa paglapas sa balaod.

Gumikan niini, niadtong Abril 11 ning bulana mihukom si Fernandez nga taktakon si dela Cuesta sa iyang katungdanan ug si Cabrera suspensohon sulod sa tulo ka bulan nga walay  benepisyo nga madawat nga mo-epekto dayon human sa maong kamanduan.

Kahinumduman nga usa ka   26 anyos nga minyo nga residente sa  barangay Tangke dakbayan sa Talisay  nga usa ka job order employee sa Parks and Playgrounds mireklamo sa DyHP nga siya gipanamastamasan sa duha ka akusado hinungdan sa iyang pagsang-at sa maong reklamo ngadto sa   kadagkuan sa City Hall sa dakbayan sa Talisay.