Gilayog sa mga polis ang usa ka 23-anyos nga lalaki kinsa misuway sa paghikog kagahapon sa kaadlawon sa sitio Kimba barangay Cansojong, dakbayan sa Talisay human nga ang iyang uyab gibawi sa mga ginikanan niini.
Ang misuway sa paghikog giila sa mga polis nga si Richard Juquilon, residente sa maong lugar.
Sila si PO3 Edwin Alvarado, PO3 Arnold Damasco, PO2 Roelito Tano ug PO1 Alan Villazurda ang daling miresponde sa maong alarma.
Si Alvarado sa pakighinabi niini sa Banat News kagahapon sa buntag mibutyag kini nga nakadawat sila og tawag gikan sa usa ka residente sa lugar kabahin sa usa ka tawo nga naghiwa sa iyang pulso.
Base sa imbestigasyon sa mga polis nga usa ka semana na ang milabay nga gibawi sa mga ginikanan ang uyab ni Juquilon nga plano unta niyang pakaslan.
Gibutyag ni Alvarado nga mokabat sa duha ka oras ang ilang gihimong negosasyon ngadto kang Juquilon apan wala gyud kini mopatuo ug nagsamad-samad na ang dapit sa liog.
Si Alvarado nagkanayon nga dihang nagpahigayon sila og negosasyon ni Juquilon wala kini laing gipangayo mao nga pabalikon ang iyang uyab.