Patay ang usa ka dalaga nga gituohang naghikog pinaagi sa pag-inom og muriatic acid sa sulod sa pansayan sa Poblacion Oriental, lungsod sa Consolacion, alas 7 pasado ang takna sa miaging gabii.
Ang namatay mao si Joy Sinanggote, 20, trabahante sa usa ka bakery nga nahimutang sa maong dapit.
Si PO3 Allan Maglangit nga nahinabi sa Banat News miingon nga ang namatay unang napalgan ni Adel Bustrillo nga kauban niining trabahante sa bakery.
Si Bustrillo miingon nga si Sinanggote sa wala pa maghikog nagkataw-anay pa uban pa kanilang mga trabahante sa ilang mga komedya.
Human sa ilang pagkomedya ug pagkataw-anay misulod si Sinanggote sa pansayan ug pipila ka gutlo ang nakalabay maoy ilang namatikdan nga nag-agulo na kini.
Gidala sa Eversly Child District Hospital ang biktima apan gideklarar sa mga doktor nga patay na kining nahidangat kanila.