Sunog sa sawang

Kapin sa 50 ka mga panimalay ang gilamoy sa dakong sunog nga niulbo sa barangay Sawang Calero atubangan mismo sa barangay hall kagahapon sa hapon,  dunay mga pagdudang tinuyo ang maong insidente.

Ang alarma nadawat sa kabomberuhan alas 3:34 ug daling giisa ngadto sa general alarm gumikan kay sagad sa mga panimalay ginama sa mga light materials ug nagsikit-sikit dugang pa ang kahuot sa gamay'ng dalan nga napuno og mga tawo.

Ang maong sunog gikatahong diha magsugod sa panimalay nga gipanag-iya ni Sally Pacaña kinsa tua na sa barangay Labangon magpuyo ug gipapuy-an na ang maong balay sa pamilyang giilang sila si Nezel Campuesto.

Dunay mga report nga giingong nag-away ang mga tagbalay sa maong panimalay ug dunay nadunggang nibahad nga “dauban’ ang balay ug dangtan pila ka minutos miulbo na sa sunog gikan sa maong balay.

Ang kapolisan sa San Nicolas mipakatap og mga polis ug niabag usab ang mga tanod sa maong barangay alang sa crowd control apan wala kini mosaler tungod kay padayon ang pagsingabot sa mga tawo ug pagsulod sa dapit samtang ang mga firetrucks nangatanggong sa gawas.

Ang sunog nakontrolar sulod sa 29 ka minutos human maisa ang general alarm diin tanang mga bombero sa kasikbit nga mga dakbayan nangabot uban sa mga fire brigade volunteers sa Ermergency Rescue Unit Foundation, Sto. Niño Fire Volunteer Brigade ug Filipino Chinese Fire Brigade.

Duna say miabag nga Search and Rescue UH-1H chopper sa Philippine Air Force gamit ang water bag aron ibubo ang tubig gikan sa dagat.

Si Supt. Esmael Codilla, fire marshal sa dakbayan mitug-an sa Banat News nga nagproblema sila sa mga tawo gumikan kay nababagan nila ang mga fire trucks, duna pay uban nga nangilog og hose aron ipauna ang ilang balay ug usa sa nakapaspas sa kalayo mao ang kainit sa panahon.

Samtang gikatahong hinay usab kaayo ang pressure sa MCWD aron maoy mosuplay og   tubig sa mga fire hydrants diin nagkuhaan og tubig ang mga fire tankers.

Usa sa nakaingon niini mao ang gigubang mga tubo sa tubig diha sa lugar tungod sa karatol sa mga tawo nga makakuha og tubig aron ibubo sa ilang mga balay ug ang uban gipang-ablihan ang ilang mga gripo.

“Gipangguba nila  ang mga tubo duol sa meter, although nakatabang na og gamay pero nakapahinay na hinuon sa atong pressure sa tubig. Dili gyud unta na nila buhaton kay makaapekto na sa atong operasyon,” asoy pang Codilla sa Banat News.

Usa ka Fil-Chinese nga fire volunteer ang natagak gikan sa fire ladder ang naangol ug gidala sa Chung Hua Hospital samtang usa ka sibilyan usab ang giingong natunok og lansang.

Si SFO2 Alicasim Espinola mitug-an sa Banat News nga dili pa nila makumpirmar ang report nga tinuyo ang sunog apan ang una nila karong gidudahan mao ang electrical misuse ug ang posibilidad nga gikan sa sug-angan kini nagsugod.