Laing 15-anyos gisulaya'g lugos

Usa ka tawo nga misulay unta og lugos sa 15 anyos nga dalagita sa miaging gabii sa sitio Tabok, barangay Lamac, lungsod sa Liloan  nadakpan sa mga silingan.

Ang   nadakpan mao si Michael Rebetse, 31, ulitawo ug nagpuyo sa maong dapit.

Si SPO1 Claudio Castro Jr.  nga nahinabi sa Banat News miingon nga nag-inusara ang biktima nga natulog sa ilang panimalay.

Gisaka kini sa suspetsado ug gihuboan na unta sa iyang sapot ang biktima hangtod nga nahigmata ug nakasinggit sa pagpangayog panabang sa mga silingan.

Ang suspetsado kinsa gikuyawan nga nahibaw-an sa mga silingan  nagdali sa paggawas sa panimalay ug mikaratil sa pagdagan pahilayo sa maong lugar.

Gitabangan kini og gukod sa mga silingan hangtod nga nasulod sa lugar nga walay kaagian nga maoy hinungdan nga nadakpan.

Gidala sa mga silingan ang suspetsado ngadto sa kapolisan ug gibalhog kini sa bilanggoan.

Matud pa ni SPO1 Castro nga ang kasong attempted rape in relation with child abuse ang gipasaka sa kapolisan batok sa maong dinakpan.