Security officer sa Transco namatay su'd sa CR

Kanhi sundalo ug chief security officer sa National Transmission Corporation (TRANSCO) namatay nga naglingkod sa inidoro sa pansayan sa iyang gipuy-ang panimalay niadtong Domingo sa alas 6:40 sa gabii diha Cedaville Residence, Nasipit, barangay Talamban ning dakbayan.

Ang namatay giila sa kapolisan nga si Ret. Col. Godofredo Gonato, 61,  stay-in employee sa Transco ug lumad nga taga Signal Village, Taguig City, Metro Manila.

Sa imbestigasyon nila ni SPO1 Rogelio Nedamo ug mga kaubanan sa Homicide Section sa Cebu City Police Office ang   biktima naglingkod kini sa inidoro sa pansayan nga wala  nay kinabuhi.

Hinuon walay nakitang timailhan nga adunay samad sa biktima nga magtumbok nga  may foul play ang kamatayon niini.

Ang kaubanan sa biktima sa panimalay ug trabahante nga cashier sa Transco nga si Ricardo Pitalcorin, 48, nga taga Camotes Island maoy nakakaplag sa patay'ng lawas sa biktima.

Si Pitalcorin miasoy sa mga imbestigador sa  Homicide Section nga niadtong Domingo sa alas 6:40 sa gabii nahiabot siya sa ilang giistahang  panimalay gikan sa trabaho sa dihang iyang nakita ang biktima nga wala nay kinabuhi.

Gitawag  ni Pitalcorin  ang ilang principal engineer nga si Susie Mari Espra nga mipahibalo usa sa ilang night shift nga security guard nga si Jomel Gauden sa Eye and Eye Security Agency.

Unang miresponde sa maong lugar ang  kapolisan sa Talamban Police Station nga gipanguluhan ni PO3 Jovanne Placencia ug mga kaubanan.

Samtang si Edward Española, personnel sa Emergency Rescue Foundation (ERUF) nga miresponde sa maong hitabo mideklarar nga ang biktima naa na sa state of rigor mortis kon paingon nang pagkadugta.

Dugang nakuhang kasayuran sa kapolisan nga ang biktima aduna kini gihambin nga sakit sa kasing-kasing ingon man high blood pressure ug gani bag-ohay lang usab kining napaubos sa bypass operation sa usa sa mga pribadong tambalanan ning dakbayan.