Gi-shotgun ang nawong naangol

Usa ka mag-uuma ang naangol human gipusil ginamit ang shotgun sa wala pa mailhing suspek samtang naglingkod lingkod sa pantawan sa ilang pinuy-anan niadtong Biyernes sa alas 11:25 sa gabii.

Ang biktima giila sa kapulisan nga si Jessie Angcay, 28,  nagpuyo sa Sitio Colabtingon, barangay Santicon  sa Badian.

Gibutyag ni PO3 Joel Caballero sa Badian police Station dihang nahinabi sa Banat News   ang biktima nagpahayahay   sa pantawan dihang kalit lang dunay usa ka lalaki  ang mipusil kaniya.

Ang biktima nakaangkon og samad pinusilan sa iyang aping og laing samad sa iyang tuo nga bahin sa liog.

Human sa hitabu daling nisibat ang suspek samtang ang biktima gidali pagdala sa mga tagtungod og silingan niini sa Badian District Hospital og  luwas  na ng kahimtang.

Sa gihimong pakisusi sa kapulisan nasuta nga usa ka twelve gauge improvised shotgun ang gigamit sa suspek pagpusil sa biktima.

Ang kapulisan naglisud karun pagtumbok sa suspek og sa motibo sa krimen tungod usab sa gihulagway nila nga kakuwang og kooperasyon sa mga silingan sa biktima