Tulisan gi-KO sa drayber

Maayong pagka-knockout sa usa ka gidudahang tulisan human kini masukmagi sa usa sa mga habal-habal driver nga iya untang ilogan og motorsiklo alang sa iyang pag-ikyas human tulisa ang usa ka manindahay og mga cellphone loads diha sa may kilid sa JY Square sa barangay Lahug ning dakbayan kagahapon sa udto.

Nagkadugo ang nawong ug naputos og bun-og sa kalawasan ni  Levin Roy Fajardo, 28, taga sitio Upper Carreta barangay Carreta, kinsa human makuyapi gikulata ug giyatak-yatakan sa mga tawo.

Ang suspek gikatahong unang mitulis kang Grace Abing ug misuway og dagan apan kini gigukod sa mga tawo hangtud nga iyang naabtan ang usa ka nag-urong nga Revolution Taxi nga gimaneho ni Andres Ballejo, 54, taga Nangka,Consolacion.

Matud pang Ballejo sa pakighinabi sa Banat News nakalitan siya dihang nisakay sa iyang tupad ang suspek ug mimando kaniya sa pagpadagan na sa taxi bisan napiit pa sila sa trapiko.

Diha-diha nasigpatan ni Ballejo nga dunay mga tawong migukod sa iyang pasahero maong iya kining gimanduan sa pagkanaog aron husayon kung unsay problema apan giingong giilugan siya niini og manobela hinungdan nga sila naglamok-lamok sa sulod.

Ang suspek daling mibunot og mahait nga improvised nga kutsilyong bronse ug gihansak-hansakan ang drayber apan kini nakapanagang hangtud nikanaog apan gipugngan gihapon ang manobela sanglit gimaniobra na kini sa suspek.

“Pwerte nakong paningkamot og panagang oy, kay pag-isa niya adto iyang kutsilyo nikilab man sa kahait,” asoy pang Ballejo.

Tungod kay wala gyud mapadagan sa suspek ang taxi mikanaog kini ug didto midagan sa nag-parking nga mga habalhabal ug unang giilugan og motor si Arnel Gabuya, 30 apan natumba ang motor hinungdan nga nigukod si Gabuya sa suspek kinsa niadtong tungura laing drayber na usab sa habalhabal nga si Ronaldo Carbajal, 34, maoy iya untang ilogan sa motorsiklo.

Si Carbajal gihansakan sa suspek og kutsilyo apan wala kini makaigo ug sa dihang talikod niini diha na sukmaga ni Carbajal sa tangkugo ang suspek hinungdan nga na-knockout kini ug naabtan sa mga tawong nigukod ug giyatakyatakan.

Ang nagpatrolyang sila si Sr. Insp. Michael Bastes hepe sa Theft and Robbery Section nga nahiagi sa dapit nakasigpat sa kagrabeng traffic ug kagubot sa mga tawo maong ila kining gisusi ug diha nila maabti si Fajardo nga nalup-og na.

Si Fajardo dihang gihinabi sa mga tigbalita mihimakak nga iyang gitulis si Abing kundili iya rang gipunit ang kwarta. Miangkon hinuon kining napriso na kaniadto tungod sa kasong robbery.

Si Bastes nagkanayon nga dunay tulo ka warrant of arrest si Fajardo sa susama gihapong mga kaso. Gipaabot pa nga mohatag og pamahayag ang mga biktima ngadto sa TRS alang sa pagpasaka og kaso batok sa suspek.(Edwin Ian Melecio)