Tseke sa eskolar ni Ruiz giapod

Mokabat sa P545,000  ang kantidad   ni 6th District Representative Nerissa Soon-Ruiz nga gitunol ngadto sa mga  tinun-an  nga nakaapil sa iyang   scholarship program.

Ang mokabat sa 179 ka mga tinun-an sa kolehiyo nga nakabenepisyo sa  scholarship program ni  Soon-Ruiz   kadaghanan kanila anaa magtungha sa Mandaue City College.

Matud pa niya nga gibati niya ang kabalaka sa kahimtang sa mga tinun-an nga gihulga nga papahawaon sa ilang gigamit nga tulunghaan sa barangay Ibabao Estancia  sanglit makaepekto man kini sa ilang pagtungha.

Si Soon-Ruiz miingon nga iyang gitinguha kahatagan lamang og katumanan ang giduso niyang balaudnon sa kongreso alang sa pagtakli gikan sa  Mandaue City College ngadto na sa Mandaue City State  College.

Kun mahingpit na ang Mandaue City State College  makakuha kini og pundo gikan sa nasudnong kagamhanan nga  mokabat sa P100,000  matag tuig aron magamit alang sa suweldo sa mga magtutudlo ug uban pa.

Matud pa ni Soon-Ruiz nga atua na sa house committee on higher education ang mao niyang balaudnon ug iyang paningkamutan nga madali usab kini sa pagtuki sa committee on budget sa ubos Balay Balaoranan.

Sa nasayran sa Banat News nga ang P4 milyones nga gahin nga gihatag ni Senador Ramon Bong Revilla sa panahon pa ni kanhi Mayor Thadeo Ouano ang   wala pa magamit niining panahona.

Gigahin ang maong kantidad alang sa katukoran sa kaugalingon niining edipisyo nga wala pa gihapon  kasugdi hangtod niining panahona tungod sa walay pagsinabtanay  sa mga nagdumala sa maong tulunghaan ug sa mga opisyal sa kagamhanan sa maong dakbayan.