Basakanon modepensa sa Aliwan

Nangandam na karon ang Lumad Basakanon Contingent sa Barangay Basak San Nicolas, alang sa pagdepensa na usab isip kampeyon sa Aliwan Festival didto sa kauluhan.

Matud sa pangulo sa nahisgutang contingent, Basak San Nicolas Barangay Captain George Rama, kini na maoy ikatulo nilang pagsalmot sa maong festival.

Nahimong kampeyon ang Lumad Basakanon niini sa niaging duha ka tuig, ug ilang maangkon ang Grand Slam kung kini mudaug karong tuiga.

Nagkanayon si kapitan Rama nga nihatag na  og pagtugot si Mayor Tomas Osmeña alang sa subli nilang pagrepresentar sa siyudad sa nahisgutang festival.

“Nihatag na man og go signal ang mayor nga muapil mi og usab sa festival, mao nga nangandam na mi,” sumala ni Rama.

Nasayran hinoon nga wala pa madeklarar pag-usab ang Lumad Basakanon nga official dance troupe sa dakbayan niining tuiga.

Ang deklarasyon gikina-hanglan aron ang nahisgutang contingent mahimo na usab nga opisyal nga entry sa siyudad alang sa nahisgutang festival.

Gawas niini, mahimo usab nga makagamit ang Lumad Basakanon sa mga ekipo sa dakbayan ug mahatagan og financial assistance.

Giputol ang pagka-official dance troupe sa Lumad Basakanon sa hinapos nga bahin sa miaging tuig aron kini makasalmot sa Sinulog 2008.

Tuod man subli nga nahimong kampeyon ang nahisgutang contingent sa Free Interpretation Category sa Sinulog niadtong miaging Enero tungod sa ilang talagsaong abilidad sa pagsayaw.

Sa ilang subli nga pagsalmot sa Aliwan festival didto sa kauluhan karong Mayo 3, malaumon si Rama nga ilang maangkon ang laing kadaugan.

Human sa nahisgutang festival musalmot usab ang Lumad Basakanon isip guest contingent sa tinuig nga festival didto sa lalawigan sa Isabela.

Nasayran usab nga ang Lumad Basakanon maoy pasalmuton sa dakbayan sa Pintados festival sa dakbayan sa Tacloban karong buwan sa Hunyo.