Nipuga  sa rehab nadakpan

Nasikop og balik ang duha sa unom ka minor offenders nga naka-eskapo didto sa Regional Rehabilitation Center for Youth (RRCY) sa Candabong,  Argao niadtong miaging semana.

Ang nasikop og balik sa kapolisan didto sa dakbayan sa Bogo giila nga si Jestoni Ynoc,18,  taga Cabancalan, Dakit, Bogo City apan minor de edad pa dihang nakahimo og kasong carnapping.

Apil sa nasikop og balik ang usa ka 15 anyos nga taga Sitio Mahayahay, Dakit, Bogo City nga nag-atubang og kasong robbery.

Ang duha ka minor de edad apil kini sa unom ka minor offenders nga nakapuga sa RRCY niadtong Biyernes sa gabii human sa gipahigayon nga family day sa maong  sentro.

Matud ni PO1 Flores Velasquez sa Womens    desk sa Bogo City Police Station nga ang   mga tinugyanan sa Department of Social Welfare and Development (DSWD) maoy mipahibalo nila sa pag-eskapo sa maong mga minor de edad diin ang duha niini mga mulopyo sa Bogo.

Kini maoy hinungdan nga gilusad sa kapolisan ang operasyon ug nasikop ang duha ka minor offenders nga apil sa naka-eskapo sa ilang tagsa tagsa ka pinuy-anan.