100 FTP gibutang sa Lapulapu

Mokabat sa 100 ka mga bag-ong polis nga ubos sa Field Training Program (FTP)  gidestino sa kapolisan sa dakbayan sa Lapulapu.

Matud pa ni Sr. Insp. Florentino Clemente, ang  administrative officer sa kapolisan sa dakbayan sa Lapulapu nga ang 100 ka mga FTP police gibahinbahin sa duha ka grupo.  Ang 40 ka mga personnel gibahinbahin sa lima ka mga presento sa kapolisan sa Lapulapu ug matag usa ka presento   adunay walo ka mga FTP.

Samtang ang 60 ka mga FTP nga giisip nga refresher policemen gibahinbahin usab kini sa mga special units sa kapolisan sa Lapulapu diin ang uban niini gibutang ubos sa pagbansaybansay sa SWAT Team, TRS, homicide ug sa Operation section.

 Gipasabot ni Clemente nga  ang 40 ka mga FTP mopaubos usab sa unom ka bulan sa ilang pagkadestino sa kapolisan sa Lapulapu diin upat ka bulan niini   luwan sa mobile patrol, usa ka bulan sa pagdumala sa trapiko ug usa ka bulan sa imbestigasyon.

Subay niini, gikalipay ni   Clemente ang presensiya sa mga FTP gumikan kay makapaminos kini sa kriminalidad sa dakbayan sa Lapulapu ilabi na kun  kini kanunay nga makita sa katawhan nga anaa sa kadalanan ug sa mga dapit nga kanunay mahitabo ang krimen ang mga unipormadong polis.

Apan si Lapulapu City Director  Supt. Louie Oppus mipasidaan sa mga bag-ong polis nga ubos sa FTP nga likayan ang pagpabadlong ug pagtahod sa ilang katungdanan isip tigbalantay sa kalinaw ug kinabuhi sa mga Oponganons aron makabaton usab kini  og respeto sa katawhan.

Kahinumduman nga sa milabay'ng pagpahigayon sa 12th Asean  Summit dinhi sa Sugbu pipila ka mga sakop sa FTP nga nadestino sa kapolisan sa dakbayan sa Lapulapu  maoy nagmugna og mga kasamok ilabi na kun  makainom sa mga tindahan ug duna usab nakalas  nga  kinabuhi.