Indian gitulis sa tulo nagmaskara

Laing Indian national   gitulis sa tulo ka mga  tulisan nga nagtaptap sa nawong   didto sa barangay West Poblacion, siyudad sa Naga niadtong Domingo sa ala 1  sa hapon samtang paingon unta kining maningil sa iyang mga kustomer nga utangan.

Ang biktima giila sa kapolisan nga si Baljit Singh, 25, ulitawo, nagpuyo sa Southwind, barangay Quimba,  siyudad sa Talisay  ug nag-negosyo og RTW.

Matud ni SPO1 Benvienedo delos Santos sa Naga  City Police station sa dihang nahinabi sa Banat News ang biktima sakay kini sa iyang motorsiklo paingon nga maningil sa iyang mga kustomer nga nakautang kaniya og RTW apan paghiabot niini sa maong lugar gipara sa tulo ka mga batan-ong  lalaki  nga armado og armas nga mobuto.

Paghunong sa biktima gitionan dayon kini sa armas sa usa sa mga suspek dayong deklarar og tulis.

Tungod sa kahadlok niya gitugyan niini ang iyang pitaka nga dunay sulod nga P1,500 nga cash, ug mga importanting dokumento, cellphone nga  Nokia 6300 ug relo de pulso nga gibanabanang mokantidad og P2,000.

Ang tulo ka mga tulisan daling misibat human makuha niini ang mga nahisgutang butang gikan sa biktima ug didto mopaingon sa sam-ang sa West Poblacion.

Matud ni PO3 delos Santos subay sa gihimo nilang follow-up operation naila nila ang usa sa tulo ka mga  gikatahapang tulisan  nga usa ka Renante Caballes,wala pa matino ang pangidaron ug nagpuyo sa West Poblacion.

Ang kapolisan padayon pa sa ilang imbestigasyon pagtumbok sa laing duha ka tulisan ug pagsikop niini.