BFP-M'daue hawod sa reg'l fire olympic

Ang Bureau of Fire Protection (BFP) sa dakbayan sa Mandaue maoy midaog sa gipasiugdahang Regional Fire Olympic sa kabomberohan dinhi sa Sugbo karong tuiga.

Ang gipilde sa dakbayan sa Mandaue ang mga bombero sa dakbayan sa Sugbo, Lapulapu ug uban pa nga misalmot usab sa maong indigay karong tuiga.

Kini gipahigayon sa Ayala sa dakbayan sa Sugbo isip nalakip sa mga kalihukan sa fire prevention month nga gipahigayon sa miaging  bulan  sa Marso karong tuiga.

Naglakip sa gihanas sa kabomberohan sa Mandaue nga ilang gipakita sa maong indigay mao ang fire fighting ug rescue operation.

Gipasalamatan ni Mandaue City Fire Marshall Oscar Mayol ang iyang mga sakop sa gipakitang  kooperasyon nga maoy hinungdan nga ilang naangkon ang maong kadaugan.

Si  Mayol miingon nga nagpadayon ang iyang tinguha nga pagbutang og tulo ka mga fire substation nga ipahimutang sa Banilad, Subangdaku ug Basak sa maong dakbayan.

Ang tulo ka mga fire substation nga ilang ipahimutang sa tulo ka barangay sa dakbayan iyang gitumong alang sa dali nga pagtubag sa alarma sa sunog sa kabarangayan,

Gipasabot niya nga makasinati og kalangan ang pagtubag sa sunog sa higayon nga  may og panaghuot sa mga sakyanan ang mga dalan nga ilang giagian paingon sa dapit nga nasunogan.