Nadsu moapil sa nat'l strike

Paluyohan sa Nagkahiusang Driver sa Sugbu  (Nadsu) ang plano karon sa Pinag-isang Samahan ng mga Tsuper at Operator Nationwide kun Piston.

Ang Piston nagplano paglusad og nationwide transport strike sa sayong bahin sunod buwan tungod usab sa giingong way hunong nga pag-usbaw sa presyo sa lana.

Matud sa secretary-general sa Nadsu, Ruben Rama, ilang ubanan ang Piston sa plano niini tungod kay sila giingong apektado usab sa umento sa presyo sa mga produktong petrolyo.

“Ang among problema usa ra man gud ni, pareho-pareho ra ba, so, mosuporta mi ana nga plano kay apektado usab mi sa oil price increase,” sumala ni Rama.

Gani midugang si Rama nga nadugangan ang ilang giantos nga problema tungod usab sa padayon karong pagsaka sa presyo sa bugas lakip na sa ubang palaliton.

Nasayran nga bag-o lang mipaumento og P.50 matag litro sa krudo, kerosene, ug gasolina ang mga kompanya sa lana dinhi sa nasud.

Katarungan sa mga oil companies   mao ang giingong padayon usab nga pagsaka sa presyo krudo sa merkado sa kalibutan.

Gani nasayran nga gitinguha pa sa mga kompaniya sa lana sa nasud ang pagpaumento  og dugang P2 matag litro sa presyo sa mga produktong petrolyo.

Kini aron ilang mabawi ang giingong pagka-alkanse nila sa walay hunong nga pagsaka sa presyo sa krudo sa world market.

Ang laing hugna sa price increase sa mga petroleum products sa  miaging semana mao na ang ika-unom nga higayon sukad sa miaging buwan.

Kini giingong mosumada na ngadto sa P3 matag litro nga gihulagway ni Rama nga nakapasamot sa kalisod sa mga drayber sa pampublikong mga sakyanan.

Nangayo na og umento sa minimum nga pletehan ang Nadsu apan matud ni Rama nga wala pa mohimo ug lakang ang LTFRB-7 sa ilang petisyon.

Miingon si Rama nga P1.50 ang gipangayong usbaw sa Nadsu sa minimum nga pletehan, apan kini giingong pabilin nga giyak-an sa hingtungdang ahensya.

Kini giingon ni Rama nga usa sa nakapadismaya kanila ug nakapadugang sa ilang tinguha pagsalmot sa planong transport strike sa ilang mother organization.