Cebu dugay nang na-bridge language

Dugay ra nga gigamit sa mga magtutudlo ang Cebuano isip bridge language sa elementarya ug sa sekondarya dinhi sa Sugbu.

Kini maoy giklaro ni Cebu City Hall Education Consultant nga si Joy Augustus Young agig reaksyon sa napasar nga resolusyon sa hunta probinsyal.

Ang provincial board pinaagi sa usa ka resolusyon  miawhag sa Department of Education   nga ipagamit ang Cebuano isip bridge language sa English ug Fipilino.

Apan matud ni Young nga sa iyang nahibaw-an, walay magtutudlo sa Sugbu nga dili mogamit sa pinulungang Sugbuanon sa nagkadaiyang tunghaan.

“Para nako wala na kinahanglana nga mopasar pa og resolusyon alang ana kay dugay ra na nga  gigamit sa mga magtutudlo,” sumala ni Young.

“Whether you like it or not it is really a bridge language, it is being used now as ever before and it will continue to be used as bridge language,” dugang pamahayag ni Young.

Giklaro hinuon sa education consultant nga siya dili supak nga gamiton sa mga magtutudlo ang Cebuano isip bridge language.

Sa labing awahing resulta sa National Achievement Test (NAT) nga gipagawas sa Deped nagpakita nga kulang  og pagsabot ang mga tinun-an sa ilang leksyon.

Ang gitugot nga “languages of instruction” (English, Filipino) giingong maoy dako og papel sa “learning process” sa mga tinun-an.

Kini maoy gibasol sa uban nganong nagkaubos ang kalidad sa edukasyon sa nasud tungod kay giingong dili kaayo makasabot ang mga tinun-an sa ilang leksyon.

Alang kang Young, dili mahinungdanon ang language nga gamiton kun dili ang labing epektibong paagi nga makakat-on ang mga tinun-an.

Sugyot sa education consultant nga mas maayong gamiton ang English ug Filipino language sa Day Care ug sa Kinder aron mahatagan ang kabataan og maayong pundasyon.

“Base sa atong study, maglisod na ang mga bata kun  adto na tudloan ug English ug Filipino sa elementary, mas maayo nga sayo silang matudloan niana,” matud ni Young.